Комроншоҳ — чемпиони ҷаҳон

Суғд, 28 октябр. (АМИТ «Ховар», Самад Юсуфӣ).-Донишҷӯйи соли дуввуми факултаи тарбияи ҷисмонии Донишгоҳи давлатии Хуҷанд ба номи академик Б.Ғафуров Комроншоҳи Устопириён  дар ҷумҳурии Латвия чемпиони ҷаҳон оид ба самбо ва соҳиби медали тиллоӣ гардид. 27 октябр ректори ДДХ,  профессор Ваҳҳоб Набиев ба донишҷӯйи ДДХ, чемпиони ҷаҳон Комроншоҳи Устопириён тӯҳфаи хотиравӣ ва ифтихорнома супорид. Варзишгари тоҷик Комроншоҳи Устопириён  чемпиони  даҳкаратаи Осиёи Миёна буда, ду карат чемпиони Осиё ва ду карат чемпиони ҷаҳон шудааст. Мавсуф зодаи ноҳияи Ҷаббор Расулов буда, соли 1993 таваллуд ёфтааст. Устоди аввалинаш падараш буд ва алъон мураббии ӯ бародараш-чемпиони бисёркаратаи ҷаҳон Фаридуншоҳ Устопиров мебошад. Ба қавли  падараш,  Комроншоҳи Устопириён аз синни сесолагӣ ба варзиши самбо, дзюдо ва гӯштини миллӣ машғул будааст.