Коррупсия — вабои мудҳиш

Душанбе, 13 октябр. (АМИТ «Ховар», Дилшодаи Хайруллоҳ). – 12-уми октябр дар  Иттифоқи  ҷумҳуриявии  ҷамъиятҳои  матлуботи Тоҷикистон  бо иштироки  кормандони дастгоҳи идоравӣ,  роҳбарон ва сармуҳосибони ташкилоту   хоҷагиҳои зертобеи Иттифоқи Тоҷикматлубот   ҷамъомад дар мавзӯи «Пешгирӣ ва  мубориза бо омилҳои    мусоидаткунанда  ба коррупсия» доир гардид. Ҷамъомад ҳамкории  судманди  мақомоти ҳифзи ҳуқуқ,  хусусан Агентии  назорати давлатии  молиявӣ ва  мубориза  бо коррупсияи Ҷумхурии Тоҷикистонро бо ташкилотҳои гуногуни давлатӣ бори дигар нишон дод. Намояндагони Агентии мазкур зимни суханронии худ аз Паёми  Президенти мамлакат  Эмомалӣ Раҳмон ба Маҷлиси Олии Ҷумҳурии Тоҷикистон  ёдовар шуда, зикр намуданд, ки   ба ин соҳа  диққати ҷиддӣ додани роҳбари давлат  бе сабаб нест. Зеро  мубориза бар зидди коррупсия  ва ҷиноятҳои  хусусияти коррупсионидошта  аз самтҳои афзалиятноки  сиёсати  Ҳукумати мамлакат мебошад.  Роҳбарияти Тоҷикматлубот низ коррупсияро  чун вабои  мудҳиш  маънидод  намуда, дар ин замина  ҳамбастагии ҷомеаи шаҳрвандӣ бо  мақомоти ҳифзи ҳуқуқро ба манфиати кор хонд.