Машварат дар Душанбе

Душанбе, 6 октябр. (АМИТ «Ховар», Бекназари  Абубакр). – Бо  мақсади рушди  муносиботи  байни Ҳукумати  Ҷумҳурии  Тоҷикистон  ва  Ҳукумати Ҷумҳурии  Федеративии  Олмон 4 – 5  октябр  дар  шаҳри  Душанбе   машварат  аз рӯи  масъалаҳои  ҳамкории  молиявию  техникӣ  баргузор  гардид.  Роҳбарии  ҳайати Ҷумҳурии  Федеративии  Олмонро  роҳбари  шӯъбаи  Осиёи  Шарқӣ ва Осиёи  Марказии  Вазорати  федералии  ҳамкорӣ ва  рушди  иқтисодӣ  Марион Урбан  ба  ӯҳда  дошт.Тавре  дар  Вазорати рушди иқтисоди  мамлакат  ба  АМИТ «Ховар»  иттилоъ  доданд,  ин  машварат  ба  манзури  баррасии  муштараки  ҳамкории  ҷорӣ  ва  омодагӣ  ба  гуфтушуниди  байниҳукуматӣ  перомуни  ҳамкорӣ  барои   давраи  дусола – солҳои  2012 – 2013  сурат  гирифт. Ҳар  ду  ҷониб якдилона  изҳори  ақида  намуданд, ки  самти  асосии  ҳамкориашон  бояд  минбаъд  ҳам   бахши  «Рушди  устувори  иқтисодиёт» қарор  гирад. Дар  ҷараёни  машварат ҳамчунин  масоили  марбут  ба  лоиҳаҳое  мавриди  муҳокима  қарор  гирифтанд, ки  аз  ҷониби ҳукумати  Олмон  маблағгузорӣ  мешаванд.