Миқдори калони меваҷоти киви нобуд карда шуд

Душанбе, 5 октябр. (АМИТ “Ховар”, Лутфия Эшонқулова).-  Дар асоси талаботи Қонуни Ҷумҳурии Тоҷикистон «Дар бораи сифат ва бехатарии маҳсулоти хӯрокворӣ» чанде пеш дар раванди ҳамкориҳои Агентии Тоҷикстандарт бо Кумитаи давлатии амнияти миллӣ ва мақомоти гумрук 21500 кг меваи киви, ки аз ҷониби ҶДММ “Ахтарон” ба  дидбонгоҳи гумрукии терминали шаҳри Душанбе ворид гашта буд, ошкор гардид. Ин меваҷот бо сабаби интиқоли нодуруст вайрон шуда, истеъмоли он барои саломатӣ хатарнок буд.Тавре ба АМИТ “Ховар” аз маркази матбуоти агентии мазкур хабар доданд, пас аз ташхис дар озмоишгоҳи ташхисии маҳсулоти хўроквории Агентии Тоҷикстандарт муайян гардид, ки меваҷоти мазкур аз рўи нишондиҳандаҳои органолептикӣ ба талаботи ҳуҷҷатҳои меъёрӣ ҷавобгўй нест.Мутобиқи ин нишондод 30 сентябри соли ҷорӣ бо иштироки комиссияи салоҳиятнок аз мақомоти гуногун ва дигар ташкилотҳои дахлдор ин миқдор мева нобуд карда шуд.