Мусоҳибаи Фаррух Шарипов дар маҷаллаи “Interview”

Душанбе, 20 октябр. (АМИТ «Ховар», Пайрав Назаров). – Ба муносибати 20-умин солгарди Истиқлолияти давлатии Ҷумҳурии Тоҷикистон ва 20-солагии робитаҳои дипломатии Тоҷикистону Туркия дар маҷаллаи “Interview” мусоҳибаи Сафири Фавқулодда ва Мухтори Ҷумҳурии Тоҷикистон дар Ҷумҳурии Туркия Фаррух Шарипов ба табъ расид. Дар оғози мусоҳиба  Ф. Шарипов иброз дошт, ки Туркия кишвари бузургу бостонӣ, гаҳвораи тамаддунҳо буда, дар он рангҳои аврупоӣ ва осиёӣ бо ҷилоҳои   зеботаринашон фароҳам омадаанд. Фаррух Шарипов бо ишора ба фарҳангу санъат ва тарзи ҳаёти халқҳои ду кишвар: афзуд, ки мардуми тоҷику турк адабиёт, санъат, арзишҳои волои маънавиро яксон ҳурмат карда, ҳаматарафа талош меварзанд, то ин муқаддасот ҳифз шаванд, рушд  ёбанд ва ғанӣ гарданд. Дипломати тоҷик дар идомаи посух ба саволҳо махсус изҳор намуд: “Мо ҳамеша бо арзи сипос ёдовар мешавем, ки Ҷумҳурии Туркия  аз аввалинҳо дар ҷаҳон истиқлолият ва соҳибихтиёрии Ҷумҳурии Тоҷикистонро ба расмият шинохт ва бо кишвари мо робитаҳои пурсамари иқтисодӣ, сиёсӣ, иҷтимоӣ ва фарҳангиро ба роҳ монд ва ин  дар навбати худ барои давлати тоҷикон ҳаётан муҳим аст”. Сафир таъкид намуд, ки Туркия  аз шарикони асосии Тоҷикистон аз лиҳози сармоягузорӣ ва савдо мебошад, лекин бояд корҳои бештар ба анҷом расанд, то зарфияту имкониятҳои мавҷуда дар ин соҳа ба таври муассир истифода шаванд. Сафир Ф. Шарипов ҳамчунин дар тақвияти суханҳои худ дар мавриди шарокати наздики Тоҷикистону Туркия тазаккур дод, ки муносибатҳои иқтисодӣ ва тиҷоратии ҳарду кишвар дорои пешравӣ ва дастовардҳои назаррас мебошанд. Тибқи маълумоти Агентии омори назди Президенти кишвар, дар 5 моҳи сипаригардидаи соли 2011 гардиши бозаргонӣ миёни Ҷумҳурии Тоҷикистон ва Ҷумҳурии Туркия 280,4 миллион доллари амрикоиро ташкил дод.Роҳбари намояндагии дипломатии Тоҷикистон дар Анқара перомуни сатҳи рушди муносибатҳои дуҷонибаи мутақобилаи судманд баён намуд, ки сафари расмии Президенти Тоҷикистон Эмомалӣ Раҳмон ба Туркия дар моҳи январи соли 2006 ва сафари расмии Президенти Туркия Абдулло Гул ба Тоҷикистон моҳи майи 2009, инчунин боздиди сарони ду давлат дар ҳошияи ҳамоиши роҳбарони кишварҳои узви Созмони ҳамкории иқтисодӣ (ЭКО) дар моҳи декабри соли 2010 ба ҳамкориҳои созандаи ҷонибҳо дар соҳаҳои мухталиф такони тоза бахшиданд.Дар ин бора аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.