Мутахассисон ба Ҳаной мераванд

Душанбе, 7 октябр.(АМИТ «Ховар», Марзия Саидова).- 2 нафар кормандони Корхонаи воҳиди давлатии /КВД/ «Заводҳои протезию ортопедии шаҳри Душанбе» тӯли се ҳафта дар Ҷумҳурии Исломии Эрон малакаи худро сайқал дода, дорои гувоҳномаи махсус гардиданд. Бояд зикр кард, ки КВД «Заводҳои протезию ортопедии шаҳри Душанбе», ки тобеи Вазорати меҳнат ва ҳифзи иҷтимоии аҳолии ҷумҳурӣ аст, дар шаҳрҳои Хуҷанд, Кӯлоб ва Хоруғ филиалҳо дошта, эҳтиёҷмандонро бо протезҳои дасту пой, ортез, пойафзолҳои ортопедӣ, асобағалҳо ва камарбанд таъмин менамояд. Корхона дар нӯҳ моҳи соли равон нақшаи истеҳсолияшро 112 % иҷро намуда, ба 105 нафар маъюбони Ҷанги Бузурги Ватанӣ, 43 нафар маъюбони Артиши собиқ шӯравӣ, 3436 нафар маъюби модарзод, 190 нафар нобино, 5202 нафар маъюби касалиҳои умумӣ ва 17 нафар шахси зимни хидмат маъюбшуда хизмат расонидааст. Барои сайқал додани малакаи кории кормандони коргоҳҳои протезу ортез ва беҳтар намудани сифати маҳсулоти протезию ортопедӣ бо ҷалби мутахассисони баландихтисоси сатҳи байналмилалӣ муддати ду моҳ дарсҳои омӯзишӣ гузаронида шуда, дар оянда се нафар аз довталабони ғолиби озмун дар Маркази ортопедии шаҳри Ҳанойи Ветнам таҳсилро идома медиҳанд.