Нақлиёти автомобилӣ воситаи асосии боркашонӣ

Душанбе, 21 октябр. (АМИТ «Ховар», Лаззат Диловарзод).- Тайи моҳҳои январ – сентябри соли 2011 тавассути ҳамаи намуди нақлиёт 46 млн. 571,1 ҳазор тонна бор кашонида шудааст.Дар ҶТ боркашонӣ тавассути нақлиёти автомобилӣ мақоми  асосиро касб намудааст. Дар давоми 9 моҳи соли ҷорӣ бо нақлиёти автомобилии ҳамаи вазорату идораҳо ва корхонаву ташкилотҳо, инчунин бо нақлиёти автомобилии шахсони воқеӣ, ки ба боркашонии тиҷоратӣ машғуланд, 39 млн. 603,7 ҳазор тонна бор кашонида шудааст, ки он 85 фоизи ҳаҷми умумии боркашонии ҳамаи намудҳои нақлиётро ташкил медиҳад.Сохтори боркашонӣ дар минтақаҳои ҷумҳурӣ нишон дод, ки аз ҳама бештар дар вилояти Суғд тавассути нақлиёти автомобилӣ бор кашонида шудааст. Дар давоми 9 моҳи соли 2011 дар вилоятиСуғд ба миқдори  15 млн. 108,9 ҳазор тонна, дар вилояти Хатлон — 13 млн. 868,6, дар ВМКБ – 163,4, дар шаҳри Душанбе – 3 млн. 419,1 ва дар ноҳияҳои тобеи ҷумҳурӣ 7 млн. 43,7 ҳазор тонна бор кашонида шудааст.