Навгониҳо дар ҷамоати деҳоти Нусратулло Махсум

Рашт, 7 октябр. (АМИТ «Ховар», Зебо Давлатова). — Ноҳияи Рашт солҳои охир бо шарофати Истиқлолият куллан тағйир ёфтаву ободу зебо гардидааст. Сатҳи зиндагии мардуми ҷамоатҳои деҳоти ноҳия беҳтар гардидааст. Ба қавли раиси ҷамоати деҳоти Нусратулло Махсум Маҳмадсаид Умаров, дар ҳудуди ҷамоат корҳои сохтмонию обдонӣ хуб ба роҳ монда шудаанд. Бо дастгирии мақомоти иҷроияи маҳаллии ноҳия дар деҳаҳои Қазнок, Чашмаи Қозӣ, Ғаввосиён, Фурудгоҳ ва Шул мактабҳои нав, синфхонаҳои иловагӣ, майдончаҳои варзишӣ, маркази савдо, маркази фурӯши масолеҳи бинокорӣ сохта ба истифода дода шуданд. Манбаъ афзуд, ки мардуми ноҳия давоми 70 соли шӯравӣ чунин ободкорию ободсозиро ёд надоштанд.