Омӯзиш барои волидони кӯдакони имконияташон маҳдуд

Душанбе, 21 октябр. (АМИТ «Ховар», Музаффар Рустамов).- Аз 18 то 25 октябри соли  2011 дар  ноҳияи  Варзоб бо ибтикори  Институти «Ҷомеаи Кушода»  – Бунёди Мадад дар Тоҷикистон, созмони ЮНИСЕФ  ва бо мусоидати Вазорати тандурустии Тоҷикистан барои мутахассисони кор бо кӯдакони имконияташон маҳдуд   омӯзиш доир гашта истодааст.
Ҳадафи омӯзиши ҳаштрӯза баланд бардоштани малака ва савияи дониши мутахассисон барои истифодаи технологияҳои нави ташхис ва ислоҳи ҳолати равониву физиологии кӯдакон ва кӯмаки равонӣ ба волидони онҳо мебошад. Дар   омӯзиш 60 нафар мутахассис аз муассисаҳои тиббиву маорифи шаҳри Душанбе ва вилоятҳои ҷумҳурӣ, волидони кӯдакони имконияташон маҳдуд ширкат доранд. Ҳангоми омӯзиш мутахассисони тоҷик малакаи худро дар соҳаи равоншиносӣ, нуқсоншиносӣ ва физиотерапия афзун мекунанд. Ин имкон медиҳад, ки дар оянда ба кӯдакони имконияташон маҳдуд беҳтар хизмат расонида шавад.