Омодагӣ ба зимистонгузаронӣ

Кӯлоб, 8 октябр. (АМИТ «Ховар», С.Холов). —   Имрӯзҳо  дар  кулли  муассисаҳои ноҳияи  Темурмалик     захира  намудани  ҳезум ва маводи сӯзишворӣ  ҷараён  дорад. Бахусус  бо  мақсади  таъмини  мӯътадили  ҷараёни  таълим  дар  фасли  сармо  дар  анбори  шӯъбаи  маориф 380 тонна ангишт,  473 метри  кубӣ  ҳезум,  сӯзишвории   биологӣ, 40  тонна  мазут  захира   шуда,  давра ба давра  дастраси  мактабҳо ва  боғчаҳои  бачагона  гардонида мешавад. Бино  ба  иттилои  мутасаддиён  15  мактаби  ноҳия  бо  хатти  озоди  барқ таъмин   буда,  дар  фасли  зимистон тавассути  печҳои  барқӣ  гарм  карда  мешаванд. Дар  маркази  саломатӣ ва  беморхонаи  марказии   ноҳия  ба  миқдори  кофӣ  ангишту  ҳезум ва  сӯзишвории  дизелӣ  захира  гардида,  мутахассисон генераторҳоро  аз  санҷиши техникӣ мегузаронанд.