«Озод» ва «Паёми нур» дар Тоҷикистон равзана боз менамоянд

Душанбе, 21 октябр.(АМИТ «Ховар», Марзия Саидова).- Донишгоҳҳои «Озод» ва «Паёми нур»-и Эрон омода ҳастанд, ки намояндагии худро дар ояндаи наздик дар Ҷумҳурии Тоҷикистон ифтитоҳ созанд. Ин нуктаро Алӣ Лориҷонӣ, Раиси Маҷлиси шӯрои Исломии Эрон зимни мулоқоташ бо Шукурҷон Зуҳуров, Раиси Маҷлиси намояндагони Тоҷикистон иброз дошт. Мавсуф зикр кард, ки донишгоҳҳои мазкур ба тайёр кардани мутахассисони соҳаи техника ва технология машғул ҳастанд.Раиси парлумони Эрон густариши ҳамкории байнипарлумонии кишвараш бо Тоҷикистонро аз муҳимтарин ҳадафи сафари худ ба Тоҷикистон арзёбӣ намуда гуфт: Мо умедвор ҳастем,  ки ин сафар паёмади хубе барои таҳкими муносиботи гуногунсоҳаи ҳарду кишвар хоҳад дошт». Дар мулоқот ҳамчунин ба зарурати истифода аз таҷрибаи якдигар дар заминаи таҳия, тадвин ва қабули қарору қонунҳо ва дигар санади дорои аҳамияти байналмилалӣ таъкид шуд.Шукурҷон Зуҳуров гуфт, ки парлумони Эрон дорои собиқаи беш аз як қарн ва таҷрибаи ғании қонунгузорист. Аз ин рӯ,  мо мехоҳем аз таҷрибаи дӯстони эронӣ бештар бархурдор бошем. Хусусан ошноӣ бо фаъолияти Пажӯҳишгоҳи қонунгузории Парлумони Эрон ва истифодаи таҷрибаи он ба манфиат аст. Дар бахши забони қонунҳо низ мо ба омӯзиши таҷрибаи Маҷлиси шӯрои Исломии Эрон   ниёзмандем, афзуд Ш.Зуҳуров.Бояд тазаккур дод, ки Маҷлиси шӯрои Исломии Эрон, ки соли 1906 таъсис дода шудааст, аз як палата иборат буда,  290 вакил дорад, ки дар чор сол як маротиба тавассути раъйдиҳӣ интихоб  мешаванд.