«Рекстон» ба коми ҷарӣ фурӯ рафт

Душанбе, 7 октябр. (АМИТ «Ховар», Лутфия Эшонқулова).-Бар асари як садамаи нақлиётии калон, ки дар шаҳри Роғун ба вуқӯъ пайваст, 6 нафар ҳалок гардида, 4 нафари дигар дар беморхона бистарӣ гардиданд. Дар ин бора ба АМИТ «Ховар» аз ВКД ҶТ иттилоъ доданд. Тибқи суханони манбаъ, 6 октябри соли ҷорӣ дар километри 83 –юми шоҳроҳи Ваҳдат-Рашт-Ҷиргатол ба болои автомашинаи тамғаи «Рекстон», ки онро сокини 49- солаи пойтахт Бадриддин Миров идора мекард, сангпораҳо рехта ва мошин ба ҷарии 300 метра чаппа мешавад. Бар асари ин ҳодиса худи ронанда ва 5 нафар мусофири ӯ, аз ҷумла тифли навзод ҷароҳати вазнин бардошта, дар ҷойи ҳодиса ба ҳалокат мерасанд. Боз 4 нафар ноболиғ бо ҷароҳатҳои гуногуни ҷисмонӣ дар беморхонаи марказии шаҳр бистарӣ гардидаанд.