Робитаҳои Душанбею Остона устувортар мегарданд

Душанбе, 5 октябр.(АМИТ «Ховар», Марзия Саидова).- Масъалаи густариши муносиботи гуногунсоҳа, бахусус робитаҳои байнипарлумонии Тоҷикистону Қазоқистон дар меҳвари мулоқоти Шукурҷон Зуҳуров, Раиси Маҷлиси намояндагони Маҷлиси Олии Ҷумҳурии Тоҷикистон ва Агибай Смагулов, Сафири Фавқулодда ва Мухтори Ҷумҳурии Қазоқистон дар Ҷумҳурии Тоҷикистон қарор гирифт. Мулоқоти мазкур 5 октябр дар шаҳри Душанбе баргузор шуд. Муҳаммадато Султонов, котиби матбуотии палатаи поёнии парлумони Тоҷикистон иттилоъ дод, ки мусоҳибон маҷмӯи масъалаҳои тақвияти ҳамкориҳои ҳар ду кишварро дар сатҳи минтақавӣ баррасӣ намуда, ба он баҳои баҳои баланд доданд. Зикр шуд, ки имрӯз ҳар ду давлат дар ҳалли кулли масъалаҳои минтақавию байналмиллалӣ ҳамдигарро дар сатҳи байналмиллалӣ дастгирӣ менамоянд. Байни ҳар ду кишвар 70 санади меъёрию ҳуқуқӣ ба имзо расидааст, ки дар таҳкими муносиботи дуҷониба нақши арзишманд мегузоранд. Якчанд комиссияи байнидавлатӣ фаъолият дошта, сандуқи сармоягузории ҳар ду давлат созмон дода шудааст, ки барои омода сохтани фазои иқтисодии кишварҳо корҳои мушахасро ба сомон расонидаанд. «Тоҷикистон омода аст, ки бо Қазоқистон дар бахшҳои коркарди маъдани кӯҳӣ, металлургияи ранга, энергетика ва коммуникатсия ҳамкории судманд дошта бошад,- афзуд Ш. Зуҳуров. Мавсуф афзуд, ки бо таъин шудани Агибай Смагулов ба ҳайси сафири Қазоқистон дар Тоҷикистон дар таърихи муносиботи Душанбе ва Остона саҳифаи нав боз гардид.