Руни ҷазо мегирад.

Душанбе, 14 октябр. (АМИТ «Ховар», Аловиддин Бӯриев) —  Комиссияи одоби Федератсияи футболи Аврупо қазияи худро нисбат ба ҳамлагари дастаи мунтахаби Англия Уэйн Руни ба тасвиб расонд. Ин бозингар дар вохӯрии охирини мунтахаби Англия бо тими мунтахаби Черногория муқобили Миодраг Ҷудович дағалона бозӣ карда, аз ҷониби довар корти сурх гирифт ва аз майдон ронда шуд. Ин корт аввалин корти сурхест, ки Руни давоми 6 сол гирифтааст. Ба ин нигоҳ накарда, комиссияи одоб Руниро аз ҳаққи иштирок  дар ҳайати дастаи мунтахаби Англия дар се бозӣ маҳрум кардааст. Акнун ин бозингари лаёқатманд дар вохӯриҳои финалии гурӯҳии ҷоми Аврупо ширкат карда наметавонад, вале Федератсияи футболи Англия давоми се рӯз имкон дорад ба ин қазия раддия фиристад.