Се ноҳия ӯҳдадории худро таъмин накарданд

Душанбе, 26 октябр.(АМИТ «Ховар», Марзия Саидова).-«Се ноҳияи кишвар  — Панҷ, Мастчоҳ ва ноҳияи Шоҳмансури пойтахт  ӯҳдадориҳои худро дар 9 моҳи соли равон дар бобати буҷа таъмин карда натавонистанд», гуфт дар ҷараёни муҳокимаи парлумонӣ Сафаралӣ Раҷабов, раиси Кумитаи иқтисод ва молияи палатаи поёнии парлумони ҷумҳурӣ.Ҳамзамон, зикр гардид, ки ба  иҷрои сифатноки қисми даромади буҷа  аҳамияти ҷиддӣ дода нашудааст. Хусусан, буҷаи вилояти Хатлон, шаҳри Душанбе ва ноҳияи Нуробод пардохти як намуди андоз, ноҳияи Рӯдакӣ ду намуди андоз ва шаҳри Роғун   3 намуди андозро ба маблағи умумии 15 миллион сомонӣ таъмин карда натавонистанд.  С. Раҷабов афзуд, ки сарфи назар аз камбудиҳои ҷойдошта иҷрои барзиёди қисми даромади буҷаи давлатӣ имконият дод, ки дар ин давра чорабиниҳои дар буҷаи давлатӣ пешбинигардида ба таври лозимӣ маблағгузорӣ шаванд. Хусусан барои пӯшонидани хароҷоти буҷаи давлатӣ аз ҳисоби маблағҳои буҷавӣ  4,5 миллиард сомонӣ, маблағҳои махсус – 301,6 миллион сомонӣ, лоиҳаҳои инвеститсионӣ – беш аз 500 миллион сомонӣ ва қарзи давлатӣ  476,1 миллион сомонӣ, дар маҷмӯъ дар ҳаҷми 5,8 миллиард сомонӣ равона карда шудааст. Ин имконият дод, ки соҳаҳои   энергетика, нақлиёт, сохтмон ва иҷтимоӣ беш аз 90 %  маблағгузорӣ шаванд.