Шӯрои сарпарастон фаъол гардид

Душанбе, 7 октябр.(АМИТ «Ховар», Марзия Саидова).- Тӯли 9 моҳи соли равон сарпарастон, ташкилоту муассисаҳо ва шахсони алоҳида ба муассисаҳои давлатии хона-интернатҳои Вазорати меҳнат ва ҳифзи иҷтимоии аҳолии ҷумҳурӣ ба маблағи беш аз 80 ҳазор сомонӣ кӯмакҳои хайриявӣ расониданд, ки беш аз 400 ҳазори сомонии кӯмакҳо ба моҳи Рамазон ва 20-умин солгарди Истиқлолияти давлатии Ҷумҳурии Тоҷикистон рост меояд. Аз Вазорати меҳнат ва ҳифзи иҷтимоии аҳолии ҷумҳурӣ ба АМИТ «Ховар» иттилоъ доданд, ки ҳаҷми кӯмакҳои хайриявӣ дар ин давра нисбат ба соли гузашта қариб дар ҳамаи муассисаҳо афзоиш ёфтааст. Ҳамзамон, соли равон барои боз ҳам беҳтар намудани хизматрасонӣ ба бошандагон, ҳалли мушкилоти хоҷагию молии муассисаҳои мазкур ва тақвияти назорати ҷамъиятии фаъолияти хона-интернатҳо бо иқдоми вазири меҳнат ва ҳифзи иҷтимоии аҳолии ҷумҳурӣ аз ҳисоби соҳибкорони ватанӣ Шӯрои сарпарастони хонаи-нтернатҳо таъсис дода шудааст. Ҳоло бо кӯмаку мусоидати Шӯро дар хона-интернати шаҳри Турсунзода таъмири як қисмати бино, дар хона-интернати ноҳияи Ҳисор гузаронидани хати алоҳидаи оби нӯшокӣ ва сохтмони бинои маъмурӣ, коркарди чортоқи бинои хона-интернатҳои ноҳияи Восеъ ва Ёвон бо маҳлули кимиёвии зиддисӯхтор ба анҷом расонида шуд. Кӯмакҳои молӣ ва пулие, ки аз ҷониби сарпарастон ва ташкилоту идораҳо ба муассисаҳои давлатии хона- интернатҳо ворид мегарданд, барои беҳдошти ҳаёти бошандагон, захираи маводи ғизоӣ ва сӯзишворӣ барои мавсими зимистон, инчунин рушди хоҷагиҳои ёрирасон истифода мешаванд. Бо ин мақсад дар муассисаҳо комиссияҳои қабул ва истифодаи кӯмакҳои хайриявӣ таъсис дода шудаанд, ки ба ҳайати онҳо бошандагони муассисаҳо низ шомил мебошанд.