Вақти тарбияи фарзанд расидааст

Хоруғ, 31 октябр. (АМИТ «Ховар»,  Л.Додо). —  Дар  машварати  васеи  назди раиси  ВМКБ, ки   дар  он  муовинони  раиси   вилоят,  муовинони  сарпарасти  раисони  шаҳру  навоҳӣ ва роҳбарони  воҳидҳои  сохторҳои  мақомоти  иҷроияи  маҳаллии  ҳокимияти  давлатии  вилоят  иштирок  доштанд, доир  гардида,  рафти  иҷрои  Қонуни «Дар  бораи  масъулияти  падару  модар  дар таълиму  тарбияи  фарзанд» мавриди баррасӣ  қарор  гирифт. Қайд  гардид, ки  омили асосии костагии  фарҳанг  дар  Бадахшон  ин тарбияи  сусти  оилавӣ  аст, зеро волидайн  ба  тарбияи фарзанд  эътибори  ҷиддӣ намедиҳанд. Муовинони  раис вазифадор  карда шуданд, ки  дар  маҳаллот бо  падару  модарон  корҳои  фаҳмондадиҳиро роҳандозӣ  намоянд, бо  ҳар  як   банди  қонун   онҳоро   ошно  намоянд, фаҳмонанд, ки  масъулияти  волидайн  дар тарбияи  фарзанд  дар  назди  қонун  чӣ  гуна  аст.