10 тонна сӯзишвории дизелӣ барои ағбаи Шаҳристон

Душанбе, 10 ноябр. (АМИТ «Ховар», Бекназари Абӯбакр). — Барои фаъолияти доимии роҳи автомобилгарди  ағбаи Шаҳристон дар мавсими тирамоҳу зимистони солҳои 2011-2012, дар майдончаи қисми ҷанубии нақби Шаҳристон хона — вагони кормандони муассисаи давлатии нигоҳдории роҳҳои автомобилгарди ноҳияи Айнӣ гузошта ва барои фаъолияти кормандон  шароити мусоид фароҳам оварда шудааст. Барои навбатдорӣ дар ағбаи Шаҳристон дар фаслҳои тирамоҳу зимистони солҳои 2011 — 2012 аз дигар муассисаҳои давлатии нигоҳдории роҳҳои автомобилгарди шаҳру ноҳияҳои вилоят  техникаву қувваи корӣ   ҷалб  шудаанд. Ҳамзамон  ситоди доимии вилоятӣ ташкил гардида, аз тарафи роҳбарият ва мутахассисони муассисаи мазкур, масъулини шӯъбаи Бозрасии давлатии автомобилии Раёсати корҳои дохилии вилоят, ситоди ҳолатҳои фавқулодда ва мудофиаи граждании вилоят, Хадамоти давлатии назорат ва танзим дар соҳаи нақлиёт навбатдории шабонарӯзӣ ба роҳ монда шудааст.  Аз хадамоти матбуоти раиси вилояти Суғд ба АМИТ «Ховар» хабар доданд, ки миқдори зарурии маводи ғизоӣ, ангиштсанг, ҳезум, сӯзишвории техникӣ ва 735 метри мукааб маводи зиддилағжиш захира гардида, аз ҷониби мақомоти иҷроияи ҳокимияти давлатии вилоят 10 тонна сӯзишвории дизелӣ ҷудо ва ба ағбаи Шаҳристон интиқол гардид.