Қотили шаҳрванди Тоҷикистон муайян гардид

Душанбе, 29 ноябр. (АМИТ «Ховар», Покиза Маҳмадбекова). – Ҳафтаи гузашта ба намояндагии Хадамоти муҳоҷирати назди президенти Тоҷикистон дар Русия оид ба қатли шаҳрванди Тоҷикистон маълумот расидааст. Як зан – шаҳрванди Русия, ки аз ифшои номаш худдорӣ кардааст, бо телефон занг зада, дархост намудааст, ки ба қазияи мазкур расидагӣ кунанд.Тибқи иттилои маркази матбуоти Хадамоти муҳоҷирати назди президенти ҶТ шаби 25-уми ноябр миёни шаҳрванди Тоҷикистон Зокир Қурбонқулови 31-сола, сокини шаҳри Душанбе ва як шаҳрванди Русия, сокини шаҳри Саранск нофаҳмӣ рух дода, ҷанҷол мешавад. Тахминан соатҳои 21:00 З. Қурбонқуловро бо ҷароҳатҳои корд дарёфт намуда, ба беморхонаи марказии шаҳри Любертси интиқол доданд, ки ӯ дар натиҷаи бардоштани захмҳои корд соати 2-и шаб ба ҳалокат расидааст. Шӯъбаи тафтишотии шаҳри Любертси аз рӯйи ин далел мутобиқи моддаи 105-и Кодекси ҷиноии Русия парвандаи ҷиноӣ боз намудааст. Дар содир намудани ҷинояти мазкур, сокини шаҳри Саранск гумонбар дониста шудааст. Дар айни замон намояндагии Хадамоти муҳоҷирати Тоҷикистон дар Русия ҷиҳати кӯмак расонидан ба оилаи фавтида тадбир андешида, ҷараёни тафтишоти парвандаи ҷиноии мазкурро таҳти назорат қарор додааст.