Ҳифзи саломатии модару фарзанд

Душанбе, 23 ноябр. (АМИТ «Ховар», Кристина Эрлих). – «Тансиҳатии репродуктивии аҳолӣ: проблемаю дастовардҳо» — чунин буд мавзӯи конфронси илмию амалӣ, ки дар Пажӯҳишгоҳи тадқиқоти илмии момоӣ, гинекология ва перинатология баргузор гардид.Дар ин бора ба хабарнигори АМИТ «Ховар» дар маркази матбуоти Вазорати тандурустии Ҷумҳурии Тоҷикистон хабар доданд. Конфронс бо ибтикори Вазорати тандурустии Ҷумҳурии Тоҷикистон дар чаҳорчӯбаи татбиқи қарори Ҳукумати ҶТ «Дар бораи ташкилу доир намудани конфронсу семинарҳои илмию амалӣ» созмон дода шуд. Дар кори конфронс беш аз 80 нафар олимони ҷавон ва мутахассисони бахши ҳифзи саломатии модару фарзанд иштирок намуда, дар он беш аз 28 маърӯза перомуни дастовардҳо ва проблемаю дурнамои рушди тансиҳатии репродуктивӣ дар Тоҷикистон шунида шуд. Мувофиқи суханони манбаъ, мақсади асосии ин чорабинӣ иборат аз табодули таҷрибаи олимони ҷавон, ҳамчунин мубоҳисаи муфассал марбут ба масоили тансиҳатии репродуктивии аҳолӣ буд.