5 ноябр-Рӯзи театри тоҷик

Душанбе, 3 ноябр. (АМИТ «Ховар», Раъно Нусратуллоева).-5 ноябр дар театри давлатии ҷавонони ба номи М.Воҳидов Рӯзи театри тоҷик таҷлил мегардад. Тибқи анъана дар ин чорабинӣ  роҳбарони   театрҳои драмавӣ, мусиқӣ-мазҳакавӣ, таҳиягарон, ҳунармандон ва  кормандони фарҳанг  иштирок мекунанд. Дар қисмати расмии чорабинӣ маросими тӯҳфасупорӣ доир мешавад, ки зимни он вазири фарҳанги кишвар Мирзошоҳрух Асрорӣ ба зиёда аз 100 нафар ҳунарманд ва корманди театрҳои ҷумҳурӣ нишони «Аълочии фарҳанги ҶТ», ифтихорнома  ва мукофоти пулӣ месупорад. Бахшида ба рӯзи театр бори аввал ба тамошобинон  намоишномаи нави театри ҷавонони пойтахт ба номи М. Воҳидов «Поёни шаби сиёҳ сафед аст»  дар таҳияи ҳунарманди халқии Тоҷикистон Мирзоватан Миров намоиш дода мешавад.  Ёдовар мешавем, ки нақшҳои асосии намоишномаро ҳунармандони  боистеъдоди театр Ҳотами Равшан, Ниёзмат Мӯсоев, Абдумӯъмин Шарифов ва дигарон иҷро менамоянд.