Ағбаи Сағирдашту роҳи Душанбе-Хоруғ бастаанд

Душанбе, 1 ноябр (АМИТ «Ховар», Лутфишоҳи Додо).- Чанд рӯз аст, ки саросари вилоят борони шадиде меборад. Бар асари боришоти зиёд аз кӯҳҳо сангҳои азиме канда мешаванду, барои сокинони деҳот хатари калонеро ба бор меоранд. Дар навоҳии болооби дарёи Панҷ сангҳои калони аз кӯҳ афтода ҷо-ҷо роҳро муваққатан маҳкам мекунанду техникаи роҳсозӣ боз роҳро мекушояд. Тавре навбатдори ситоди ҳолатҳои фавқулоддаи ҳифзи шаҳрвандон ва танзимгари Идораи роҳсозии вилоят Гавҳаршоҳ Ошӯров иттилоъ дод, дар ағбаи Сағирдашт баробари 40 сантиметр барф борида, роҳи ағба баста шудааст. Дар деҳаи Даштаки ноҳияи Ванҷ бар асари аз кӯҳ канда шудани харсангҳо аз пагоҳӣ боз роҳи Душанбе-Хоруғ баста аст.Барои тоза кардани роҳ техникаи роҳсозӣ истифода мешавад.