Аввалин сокинони қасабаҳои нав муайян шуданд

Душанбе, 4 ноябр. (АМИТ «Ховар», Бекназари Абӯбакр). — Имрӯз заминҳои қасабаҳои 1-ум ва 2-юми шаҳри Хуҷанд барои сохтмони манзил дар ҳузури соҳибони ояндаашон – аввалин сокинони ин минтақаи доманакӯҳ тақсим гардиданд.Раиси шаҳри Хуҷанд Раҷаббой Каримов онҳоеро, ки дар арафаи Рӯзи Конститутсияи Ҷумҳурии Тоҷикистон ва иди Қурбон соҳиби сертификат ва қитъаи замин шуданд, табрик намуд ва изҳори  умед кард, ки бо бунёди садҳо хонаҳои истиқоматӣ, иморатҳои хуштарҳу зебо, марказҳои савдою хизматрасонии маишӣ, майдончаҳои варзишӣ,  бо кӯчаҳои васею чароғон ва канорашон сердолу дарахт ин мавзеи хушбоду ҳаво ба як гӯшаи сабзу хуррам ва дилрабои шаҳри Хуҷанд табдил хоҳад ёфт.Дар ин мавзеъ 49,2 гектар замин барои тақсимот ба аҳолӣ пешбинӣ шудааст. Дар  рӯзи аввали тақсими қитъаи замин 127 нафар сокинони шаҳри Хуҷанд соҳиби замини наздиҳавлигӣ шуданд ва   рӯзҳои наздик аз ҳамин мавзеъ боз  70 нафар қитъаи заминро соҳиб мегарданд.