Баррасии масоили ҳифзи иҷтимоии муҳоҷирон

Душанбе, 22 ноябр. (АМИТ «Ховар», Лутфия Эшонқулова). – Зимни мулоқоти муовини аввали сардори Хадамоти муҳоҷирати назди Ҳукумати Ҷумҳурии Тоҷикистон Алишер Бобоев ва мушовири Бонки Умумиҷаҳонӣ Томас Ачакосо бо вазири меҳнат ва ҳифзи иҷтимоии Тоҷикистон Маҳмадамин Маҳмадаминов масоили ҳамкорӣ дар бахши муҳоҷирати меҳнатӣ мавриди муҳокима қарор гирифтанд. Дар мулоқот масъалаҳои касбомӯзии муҳоҷирони меҳнатӣ, истифодаи маблағҳои интиқолшавандаи муҳоҷирони меҳнатӣ ба рушди иқтисодиёти Тоҷикистон, ҳамчунин бимаи иҷтимоӣ ва ҳифзи меҳнаткашон баррасӣ шуданд. Мувофиқи хабари маркази матбуоти Хадамоти муҳоҷирати назди Ҳукумати Ҷумҳурии Тоҷикистон, вазири меҳнат ва ҳифзи иҷтимоии Тоҷикистон М.Маҳмадаминов ба Намояндагии Бонки Умумиҷаҳонӣ дар Тоҷикистон барои саҳмаш ба ҳалли проблемаҳои муҳоҷирати меҳнатӣ изҳори миннатдорӣ карда ва иброз дошт, ки ҳамкории ҷонибайн минбаъд ҳам рушд хоҳад ёфт.