Чорабинии тантанавии фарҳангӣ бахшида ба 20-солагии ИДМ

Душанбе, 21 ноябр. (АМИТ «Ховар», Пайрав Назаров). — Дар шаҳри Вена бо ташаббуси Сафорати ҶТ дар Австрия ва сафоратҳои кишварҳои аъзои Иттиҳоди Давлатҳои Мустақил чорабинии тантанавии фарҳангӣ бахшида ба 20-солагии ИДМ бо иштироки намояндагиҳои дипломатии кишварҳои номбурда, масъулини ҳукумат ва сохторҳои давлативу ҷамъиятии кишвари иқомат, корпуси дипломатӣ ва ҳамватанон барпо гардид.Тавре ки аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» иттилоъ доданд, дар оғози чорабинӣ сафири фавқулодда ва мухтори ҶТ дар Австрия Нуриддин Шамсов ба ҳайси намояндаи Раёсати амалкунандаи ИДМ зимни суханронӣ ба таври мухтасар доир ба роҳи тайнамудаи Иттиҳод тайи 20 сол, натиҷаҳо ва қарорҳои Саммити ҷашнии ИДМ, ки 3 сентябри соли ҷорӣ дар Душанбе барпо гардида буд, ибрози назар намуд. Қайд гардид, ки Эъломияи Душанбе дастоварду муваффақиятҳои созмонро тайи марҳилаи гузашта ҷамъбаст ва самтҳои минбаъдаи ҳамкории самарабахшро миёни кишварҳои аъзои ИДМ мушаххас намуд.Сипас қисми фарҳангии чорабинӣ иборат аз намоишгоҳи аксҳо, намоишгоҳи китоб ва намоишгоҳи таомҳои миллии кишварҳои аъзои ИДМ шурӯъ гардид. Сафорати Тоҷикистон дар Австрия дар ҳар се бахши намоишгоҳ ширкат варзид. Дар бахши аввал аксҳо аз ҳаёти мардуми тоҷик, дастовардҳои иқтисодӣ ва фарҳангии Тоҷикистон ба маърази тамошо гузошта шуд. Дар қисмати намоишгоҳи китоб ҳозирин бо намунаҳои асарҳои сиёсӣ, иқтисодӣ, бадеӣ, фарҳангӣ ва сайёҳии кишвар ошно гардиданд. Намунаҳои таомҳои миллии тоҷикӣ дар бахши сеюми чорабинии фарҳангӣ боиси истиқболи васеъ қарор гирифта, меҳмонон ба онҳо баҳои баланд доданд.Манбаъ, ҳамчунин хабар дод, ки дар анҷоми чорабинӣ сарони намояндагиҳои дипломатии кишварҳои аъзои ИДМ пешниҳод намуданд, ки минбаъд чорабиниҳои номбурда ба таври мунтазам дар шаҳри Вена барпо карда шаванд.