Дар Фархор ба қадри омӯзгор мерасанд

Фархор, 26 ноябр. (АМИТ «Ховар», С. Холов).-Наздики 30 тан омӯзгори маҳаллӣ дар «Шаҳраки омӯзгорон»-и ноҳияи Фархор соҳиби манзил гаштанд. Ҳукумати маҳаллӣ ба хотири ҷалби бештари омӯзгорон ба мактаб дар як канори маркази ноҳия барои омӯзгорон қитъаи замин ҷудо намуда, барои бунёди хонаҳояшон кӯмак намудааст. Ин бори аввал аст, ки барои омӯзгорон дар минтақаи Кӯлоб маҳаллаи хосса бунёд мекунанд. Афзалшоҳ Сафаров, мудири маорифи ноҳияи Фархор мегӯяд: тайи чанд соли охир истифода нашудани имтиёзҳо аксари омӯзгоронро аз касби интихоб кардаашон дилсард намуда буд.Ба гуфтаи ӯ, додани замин ва бунёди манзили зист барои омӯзгорон имкон медиҳад, ки онҳо нисбат ба касбашон дилгарм шаванд.