Даргузашти журналисти маъруф

Душанбе, 18 ноябр. (АМИТ «Ховар», Мавҷуда Анварӣ).- Субҳи имрӯз пас аз бемории начандон тӯлонӣ журналисти маъруфи тоҷик Ҷумъабой Толибов дар синни 52-солагӣ аз олам даргузашт.Толибов Ҷумъабой Ҷӯраевич (Ҷумъаи Толиб) 25-уми январи соли 1960 таваллуд шудааст. Оиладор, соҳиби 6 фарзанд. Соли 1979 ба Университети Давлатии Тоҷикистон ба номи В.И.Ленин (факултаи журналистика) дохил шуда, соли 1984 таҳсилро ба анҷом расонидааст.Аз соли 1989 то 1994 дар Донишгоҳи Давлатии Тоҷикистон (факултаи ҳуқуқшиносӣ) таҳсил кардааст. Солҳои 1984-1994 дар рӯзномаи ноҳиявии «Меҳнат»-и ноҳияи Айнӣ ба сифати мусаҳҳеҳ, мухбир ва мудири шӯъба кор кардааст. Солҳои 1994-1995 сармуҳаррири газетаи «Нури ҳақ»-и ноҳияи Айнӣ ва солҳои 1998-2004 мудири шӯъбаи ҳуқуқи ҳукумати ноҳияи Айнӣ буд. Аз соли 2008 директори Бюрои маслиҳатдиҳӣ, сухансанҷӣ ва тадқиқоти журналистӣ, ҳамзамон, аз моҳи марти соли 2009 сармуҳаррири ҳафтаномаи ҷамъиятиву сиёсии «Пайкон» буд.Аз соли 1987 узви Конфедератсияи байналхалқии журналистон, аз соли 1984 узви Иттифоқи журналистони Тоҷикистон буд ва унвони «Аълочии матбуоти Тоҷикистон»-ро дошт.