Ду садамаи нақлиётии марговар

Душанбе, 14 ноябр. (АМИТ «Ховар», Лутфия Эшонқулова). – Шабонарӯзи гузашта дар роҳҳои автомобилгарди ҷумҳурӣ ду садамаи нақлиётӣ ба вуқӯъ пайваст .Тавре аз маркази матбуоти ВКД ҶТ ба АМИТ «Ховар» хабар доданд, ронандаи мошини тамғаи «Опел-Вектра» Искандарбек Ғозибекови 25-сола, истиқоматкунандаи деҳаи Ленини ноҳияи Ҷалолиддини Румии вилояти Хатлон ҳангоми ҳаракат аз тарафи шаҳри Қурғонтеппа ба самти ноҳия дар ҳудуди ҷамоати деҳоти Узун бехатарии ҳаракати роҳро риоя накарда, пиёдагард Абдуқаҳҳоров Абдуллои 34-соларо пахш намудааст, ки дар натиҷа пиёдагард ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. Садамаи нақлиётии дуюми марговар дар ноҳияи Сино-2 шаҳри Душанбе рух додааст.Ронандаи мошини «Хундай-Старекс» Тошев Геннадии 44-сола ҳангоми ҳаракат дар кӯчаи Нусратулло Махсум бехатарии ҳаракат дар роҳро риоя накарда, ноболиғ Ҷумъаев Алиҷони 3-сола, истиқоматкунандаи кӯчаи Зарафшонро пахш намудааст, ки дар натиҷа ноболиғ ҷароҳати вазнини ҷисмонӣ бардошта дар беморхона ба ҳалокат расидааст.