Фаъолияти гурӯҳи ташвиқотӣ

Душанбе, 23 ноябр. (АМИТ «Ховар», Лутфия Эшонқулова). – Гурӯҳи ташвиқотии Агентии назорати маводи нашъаовари назди Президенти ҶТ аз 22 то 29 ноябр аз ноҳияҳои сарҳадии вилояти Хатлон (Қумсангир, Панҷ ва Ҳамадонӣ) дидан мекунад. Тавре дар маркази матбуоти Агентӣ ба АМИТ «Ховар» иттилоъ доданд, ин тадбир бо мақсади татбиқи лоиҳаи «Роҳандозӣ намудани тадбирҳои огоҳонию ҷилавгирӣ ва тавзеҳотӣ» ҷиҳати густариши муборизаи зидди гардиши маводи нашъаовар амалӣ мешавад. Дар чорабиниҳои зидди маводи нашъаовар роҳбарони мақомоти ҳокимияти маҳаллӣ, аъзои шӯроҳои ҳамоҳангсозии ноҳиявӣ оид ба ҷилавгирии нашъамандӣ, намояндагони Кумитаи ҷавонон, варзиш ва сайёҳӣ, кормандони муассисаҳои таҳсилоти умумӣ ва тиббӣ иштирок менамоянд.