Форуми байналмилалӣ

Душанбе, 15 ноябр. (АМИТ «Ховар», Пайрав Назаров). — Имрӯз, 15 ноябр дар шаҳри Остонаи Ҷумҳурии Қазоқистон Форуми VII байналмилалии «Муколамаи забону фарҳангҳои ИДМ ва СҲШ дар қарни XXI» оғоз меёбад. Тавре дар Хадамоти матбуоти Кумитаи иҷроияи ИДМ ба АМИТ «Ховар» иттилоъ доданд, Форум дар шакли иҷлосияҳои умумиву шӯъбавӣ сурат гирифта ва дар онҳо олимон, ходимони шинохтаи сиёсӣ ва ҷавонони боистеъдоди кишварҳои мухталиф ширкат мекунанд. Иштирокдорони форум ҷанбаҳои сиёсӣ, ҳуқуқӣ, иқтисодӣ, иҷтимоӣ, фарҳангӣ ва байнизабонии таҳкими ҳамкории кишварҳои ИДМ ва СҲШ-ро мавриди муҳокима қарор медиҳанд.Форум бо имзои Ёддошт дар бораи рушди минбаъдаи ҳамкорӣ дар бахши маърифати ҷаҳонии давлатҳои аъзои ИДМ ва қабули тавсияҳо анҷом меёбад. Ин чорабиниро Донишгоҳи давлатии забоншиносии Маскав бо дастгирии Бунёди байнидавлатии ҳамкории башардӯстонаи давлатҳои аъзои ИДМ созмон додааст.