Гуфтугӯи телефонии Ҳамрохон Зарифӣ бо Залмай Расул

Душанбе, 17 ноябр. (АМИТ «Ховар», Пайрав Назаров). — 17 ноябри соли 2011 гуфтугӯи телефонии Вазири корҳои хориҷии Ҷумҳурии Тоҷикистон Ҳамрохон Зарифӣ бо Вазири корҳои хориҷии Ҷумҳурии Исломии Афғонистон Залмай Расул баргузор гардид.Зимни сӯҳбат ҷонибҳо ҳолати кунунӣ ва дурнамои рушди минбаъдаи муносибатҳои дуҷонибаи Тоҷикистону Афғонистон, вазъ дар минтақа, ҳамкории ҳарду давлат дар чаҳорчӯби созмонҳои минтақавӣ ва байналмилалӣ, инчунин дигар масъалаҳои мавриди таваҷҷӯҳи тарафайнро муҳокима карданд.Вазири корҳои хориҷии Тоҷикистон қайд намуд, ки кишвари ӯ ба ҳамкории густурда бо Афғонистон дар ҳалли мушкилоти минтақавӣ аҳамияти махсус медиҳад. Дар ин робита ба наздикӣ Намояндаи вижаи Президенти Ҷумҳурии Тоҷикистон оид ба Афғонистон ва Покистон таъин шуд, ки ин амр минбаъд ба ҳамкории боз ҳам созанда мусоидат хоҳад кард. Ҳ. Зарифӣ ҳамчунин аз ҳамтои афғони худ хоҳиш намуд, ки ба масъалаи истирдоди маҳбусони тоҷик, ки дар ҳабсхонаҳои Афғонистон қарор доранд, суръат бахшида шавад. Дар навбати худ Залмай Расул иттилоъ дод, ки масъалаи мазкур мавриди баррасии роҳбарияти Афғонистон қарор дошта, имкон аст, ки дар мӯҳлати наздик яке аз маҳкумшудагон Яков Тсой ба Тоҷикистон баргардонида шавад.