Маҳсулоти соҳаи саноату кишоварзӣ намоиш дода мешавад

Душанбе, 29 ноябр. (АМИТ «Ховар», Покиза Маҳмадбекова). – Аз 30 ноябр то 3 декабр дар пойтахти кишвар маҳсулоти соҳаи саноату кишоварзии музофоти Хуросони Разавии Ҷумҳурии Исломии Эрон ба маърази намоиш гузошта мешавад. Тавре дар Палатаи савдо ва саноати ҶТ ба АМИТ «Ховар» хабар доданд, дар намоишгоҳ беш аз 30 ширкати машғул ба тавлиди маҳсулоти саноатию кишоварзии Эрон иштирок менамоянд. Ҳоло дар Тоҷикистон қариб 150 корхона бо истифода аз сармояи Эрон фаъолият дорад. Намоишгоҳро Палатаи савдо ва саноати Тоҷикистон ва Ҷумҳурии Исломии Эрон созмон додаанд. Мувофиқи маълумоти расмии омор, дар ҳоли ҳозир муомилоти моли байни ҳар ду кишвар ба 250 миллион доллар расидааст.