Нигаронии Раиси Маҷлиси намояндагон

Душанбе, 15 ноябр. (АМИТ «Ховар», Дилшодаи Хайруллоҳ). — Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров 14 ноябр зимни баргузории ҷаласаи навбатии Шӯрои Маҷлиси намояндагон дар баробари баррасии масъалаҳои рӯзномаи Шӯро, ҳамчунин аз вазъи муҳоҷирони меҳнатии тоҷик дар Русия изҳори нигаронӣ кард. Шукурҷон Зуҳуров иброз дошт, ки мутаассифона, ҳафтаи охир расонаҳои хабарии Русия зимни пахши мавод дар бораи зиндонӣ шудани ду халабони ҳавопаймоҳои ин кишвар дар Тоҷикистон иттилои нодуруст дода, бо ин роҳ заминаи эҷоди фишор ба муҳоҷирони меҳнатии тоҷик дар Русияро ба вуҷуд овардаанд. Ӯҳамчунин иброз намуд, ки баррасии парвандаи мазкур бо риояи тамоми меъёрҳои мурофиавӣ тавассути қонунгузории миллии кишвар ва ӯҳдадориҳои байналмилалии он анҷом шудааст.Раиси Маҷлиси намояндагон супориш дод, ки бо ҳадафи баррасии вазъи муҳоҷирони меҳнатии тоҷик дар минтақаҳои гуногуни Русия аз ҳисоби вакилони ин мақоми олии қонунгузор як ҳайати корӣ таъсис дода шавад. Ҳайати мазкур рӯзҳои наздик ба минтақаҳои кишвари Русия сафар карда, бо вазъияти кору зиндагии муҳоҷирони тоҷик аз наздик ошно хоҳад шуд.Шукурҷон Зуҳуров таъкид дошт, ки масъалаи мазкур дар маркази таваҷҷӯҳи роҳбарияти давлату ҳукумати Ҷумҳурии Тоҷикистон қарор дорад. Дар ин росто, роҳбарияти Маҷлиси намояндагони Маҷлиси Олии Ҷумҳурии Тоҷикистон низ ибрози умедворӣ менамояд, ки ин масъала бо роҳи дипломатӣ ҳал шуда, ҳамаи нофаҳмиҳо аз миён бардошта хоҳанд шуд.