Омили инкишофи ҷомеа

Суғд, 19 ноябр. (АМИТ «Ховар», Самад Юсуфӣ).- Лоиҳаи барномаи «Таҳсилоти духтарон» аз ҷониби ташкилоти байналмилалии Юнисеф ду сол қабл дар 26 мактаби ноҳияи Бобоҷон Ғафуров фаъолияти худро оғоз намуд. Алҳол дар ҳамаи 26 мактаби ноҳия ташкилоти кўдакона созмон дода шуда, ба он зиёда аз 600 нафар хонанда фаро гирифта шудаанд. Чанде қабл дар мактаби таҳсилоти миёнаи умумии №11 ҷамоати Ёва ташкилоти ҷамъиятии «Нури саломатӣ» бо дастгирии Хазинаи кӯдакони СММ чорабинии фарҳангию фароғатӣ доир намуд. Дар он мудири шӯъбаи маорифи ноҳия Дилбар Турсунова дар мавриди таҳсили кӯдакон ва ҳуқуқҳои кӯдак, бахусус таҳсили духтарон дар мактабҳои деҳот сухан гуфт. Муҳассилини ноҳия бо барномаи фарҳангию фароғатии худ таҳсилоти духтаронро омили асосии инкишофи ҷомеа арзёбӣ намуданд.