Омодагӣ ба интихоботи миёнадавраӣ

Душанбе, 4 ноябр.(АМИТ «Ховар», Марзия Саидова).- «Бо қарори Комиссияи марказии интихобот ва раъйпурсии Ҷумҳурии Тоҷикистон дар ҳавзаи интихоботии Шоҳмансур №3 49 қитъаи интихоботӣ созмон дода шудааст, ки 38 адади он дар ҳудуди ноҳияи Шоҳмансур ва 11 –тоаш дар қаламрави ноҳияи Фирдавсӣ  ҷойгиранд», — гуфт зимни гузориши худ роҳбари дастгоҳи Комиссияи марказии интихобот ва раъйпурсии ҷумҳурӣ Абдуманнон Додоев дар ҷаласаи Комиссияи мазкур, ки 4 ноябр дар шаҳри Душанбе доир гардид. Зикр шуд, ки бо мақсади дар сатҳи баланд баргузор намудани интихоботи миёнадавраӣ дар ҳавзаи интихоботии Шоҳмансур №3, ки 18 декабри соли 2011 муайян гардидааст, тадбирҳои судманд андешида шуда,  чорабиниҳо зери назорати доимии Комиссияи марказии интихобот ва раъйпурсиии ҷумҳурӣ қарор доранд.