Паҳлӯҳои илми табиатшиносӣ

Душанбе, 15 ноябр. (АМИТ «Ховар», Лаззат Диловарзод).-«Паҳлӯҳои илми табиатшиносӣ»- чунин ном дорад асари нави рӯзноманигори шинохта ва ҷанговари солхӯрда Олег Дмитриевич Соболев, ки наздик ба 60 сол аст дар Тоҷикистон зиндагӣ ва эҷод мекунад. Ба гуфти муаллиф ғояи таълифи асар дар дафтари кории президети Академияи илмҳои Тоҷикистон Мамадшо Илолов пайдо гардид. Барои омода ва чопи асар маводи беш аз 50 сол ҷамъовардаи муаллиф, кашфиёту бозёфтҳои донишмандон дар бораи илмҳои табиатшиносӣ, гуманитарӣ ва дақиқ, мавриди истифода қарор ёфтааст. Олег Дмитриевич аз жанри илмии оммавӣ, ки метавонад шумораи бештари хонандагон ва олимони ҷавонро ҷалб созад, истифода кардааст. Нависанда дар ин кори начандон осон тавонистааст хонандаро вобаста ба фаъолияти қисме аз олимони АИ, ки чун муҳаррикони назарияи илмӣ дар рушду тараққӣ ва пешрафти Тоҷикистон саҳм гузоштаанд, ошно созад.Дар асар муаллиф сараввал дар бораи фаъолияти президентони академия: Садриддин Айнӣ, Султон Умаров, Муҳаммад Осимӣ, Собит Неъматуллоев, Улмас Мирсаидов ва Мамадшо Илолов маълумот дода, сипас ба тавсифи симои эҷодии ин олимони намоён, ки дар давоми 60 соли фаъолияти Академияи илмҳо шумораашон ба 84 узв ва узви вобаста расидааст, мегузарад. Ба гуфти муаллиф ҳар кадоми ин нафарон нафақат сазовори очерк, балки китоби алоҳида мебошанд. То кадом дараҷа ба умқи илми табиатшиносӣ роҳ ёфтани муаллифи асар ба хонандаи некбин ҳавола шудааст.