Рақобати чор номзад барои як курсӣ

Душанбе, 4 ноябр.(АМИТ «Ховар», Марзия Саидова).-Пешбарии номзадҳо  ба вакили Маҷлиси намояндагони Маҷлиси Олии Ҷумҳурии Тоҷикистон дар ҳавзаи интихоботии Шоҳмансур №3 анҷом ёфт.Се  нафар номзад аз ҳизбҳои сиёсӣ ва як нафар ба таври худпешбарӣ номзад ба вакили Маҷлиси намояндагон  пешниҳод гардидаанд. Номзадҳо Абдуҳалим Ғаффоров, раиси Ҳизби сотсиалистии Тоҷикистон, Абдуқаҳҳор Турсунов, ноиби ректори Донишгоҳи  техникии  Тоҷикистон ба номи М. Осимӣ ба таври худпешбарӣ,  Сӯҳроб Шарифов, директори Маркази тадқиқоти стратегии назди Президенти ҷумҳурӣ, намояндаи ҲҲДТ ва Сӯҳроб Оймаҳмадов, директори  генералии ширкати «Эйшин Экспресс» аз Ҳизби  ислоҳоти иқтисодии Тоҷикистон мебошанд.Бақайдгирии номзадҳо дар ҳавзаи интихоботии Шоҳмансур №3 тибқи қарори Комиссияи марказии интихобот ва раъйпурсии ҷумҳурӣ  имрӯз шурӯъ гардида, то 18 ноябри  соли равон идома меёбад.