Раиси беҳтарин интихоб шуд

Душанбе, 29 ноябр. (АМИТ «Ховар», Марҳабо Зунунова). – Раиси иттифоқи касабаи муаллимони факултаи биологияи Донишгоҳи миллии Тоҷикистон Зӯҳро Ҳамроева чун ғолиби озмун беҳтарин раиси ташкилоти ибтидоии иттифоқи касаба дар соли 2011 гардид.Чанде пеш дар истироҳатгоҳи «Варзоб» даври хотимавии озмуни ҷумҳуриявии «Раиси ташкилоти ибтидоии иттифоқи касабаи соли 2011» байни раисони иттифоқҳои касабаи 16 донишкадаи олии ҷумҳурӣ ва Академияи улуми Ҷумҳурии Тоҷикистон баргузор шуд.Дар маросими ифтитоҳи озмун раиси Федератсияи иттифоқҳои касабаи мустақили Тоҷикистон Муродалӣ Солеҳов, раиси Кумитаи марказии иттифоқи касабаи кормандони маориф ва илми Ҷумҳурии Тоҷикистон Абдурозиқ Ризоев, муовини вазири маорифи Ҷумҳурии Тоҷикистон Фатҳиддин Усмонов ва дигарон ширкат доштанд.Хотирнишон месозем, ки соли 2000 анҷумани Х иттифоқи касабаи соҳавӣ баргузор гардида, фаъолиятро ҷиҳати ҳифзи ҳуқуқу манофеи меҳнатӣ, иҷтимоӣ, иқтисодӣ, ва зеҳнии кормандони илму маориф ва донишҷӯён мақсади худ қарор дода буд.