Саҳми олимон ва мутахассисон дар бунёди боғҳо

Душанбе, 24 ноябр. (АМИТ «Ховар», Лаззат Диловарзод),- Пажӯҳишгоҳи боғпарварию сабзавоткории Академияи илмҳои кишоварзии Тоҷикистон дар бунёди боғҳои намунавӣ саҳми арзанда дорад,- иброз намуд президенти Академияи илмҳои кишоварзии Тоҷикистон Ҳикматулло Аҳмадов ба мухбири АМИТ «Ховар». Олимону мутахассисони пажӯҳишгоҳи мазкур бо мақсади татбиқи дастовардҳои илмӣ ва таҷрибаи пешқадам дар бунёди 250 гектар боғи намунавии ноҳияи Ҷиликӯл ва бунёди 3 гектар ангурзори дорои навъи ангури «Зариф», ки офаридаи олимони Пажӯҳишгоҳи боғпарварию сабзавоткории АИ кишоварзии Тоҷикистон мебошад, саҳми арзанда доранд. Бо роҳбарии мутахассисони пажӯҳишгоҳ дар ноҳияи Хуросон 68 гектар боғи зардолу, 16 гектар шафтолу, дар хоҷагии деҳқонии «Асадулло»-и ҳамин ноҳия токзор бунёд шуда ва дар барқароркунии токзори ноҳияи Данғара аз усулҳои нави пешқадами боғдорӣ истифода шуда, дар давоми ду сол ба гирифтани ҳосили ангури навъи кишмиши сиёҳ ноил шуданд. Бо тавсия ва иштироки бевоситаи олимон дар ноҳияи Қубодиёни вилояти Хатлон 4 гектар боғи ангури навъи кишмиши сиёҳ ва як гектар зардолузори навъи қандак бунёд карда шуд.