Саршумори қутос меафзояд

Душанбе, 18 ноябр. (АМИТ «Ховар», Лаззат Диловарзод).- Минтақаи Лахши ноҳияи Ҷиргатол барои парвариш ва афзоиши қутос хеле мусоид аст. То солҳои 90 – уми асри ХХ дар ҳамаи хоҷагиҳои давлатии минтақа парвариши қутос ба роҳ монда шуда буд ва хоҷагидорон аз ин соҳа даромади зиёд ба даст меоварданд. Бо Қарори Ҳукумати ҷумҳурӣ соли 2002 ба хоҷагиҳои қутоспарварии ноҳия қарзи дарозмӯҳлати имтиёзнок дода шуд. Тавассути ин қарз аз ноҳияи Мурғоб 123 сар қутос харида ва ба мавзеи Лахш интиқол дода шуд. Айни ҳол дар хоҷагии давлатии «Қизилсу» ва хоҷагиҳои инфиродии «Миршодӣ» ва «Баракатулло» 244 сар қутос парвариш меёбад. Танҳо дар давоми 9 моҳи соли ҷорӣ аз 96 сар қутос 56 сар насл гирифта шудааст. Аз назари коршиносон дар мавзеи Лахш парвариши 10 ҳазор сар қутос имкон дорад. Аз ин рӯ хоҷагиҳо мақсад доранд, ки саршумори қутосро сол то сол зиёд ва даромад аз онро бештар намоянд.