Тағйиру иловаҳо ба Кодекси гумруки Ҷумҳурии Тоҷикистон

Душанбе, 15 ноябр. (АМИТ «Ховар», Дилшодаи Хайруллоҳ). -14 ноябр таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ҷаласаи навбатии Шӯрои Маҷлиси намояндагон баргузор шуд. Дар Шӯро лоиҳаҳои қонунҳои Ҷумҳурии Тоҷикистон «Дар бораи аудити экологӣ», «Дар бораи таҳсилоти иловагӣ», «Оид ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2011», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи реклама» ва «Дар бораи ворид намудани тағйиру иловаҳо ба Кодекси гумруки Ҷумҳурии Тоҷикистон» баррасӣ гардиданд.Аъзои Шӯро ҳамчунин масъалаҳо дар бораи ҳисоботи Бонки миллии Тоҷикистон оид ба иҷрои дурнамои сиёсати пулию қарзии Ҷумҳурии Тоҷикистон дар 9 моҳи соли 2011 ва «Дурнамои сиёсати пулию қарзии Ҷумҳурии Тоҷикистон барои соли 2012», «Дар бораи даъват кардани ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон, даъвати чорум» ва «Дар бораи рӯзномаи ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон, даъвати чорум»-ро муҳокима карданд.