Танини «Суруди сарбоз» ба ифтихори Рӯзи Парчам

Душанбе, 23 ноябр. (АМИТ «Ховар», Бекназари Абӯбакр). — Бо ташаббуси Раёсати ҷавонон, варзиш ва сайёҳии вилояти Суғд дар шаҳри Хуҷанд фестивал — озмуни вилоятии сурудҳои ватанпарастона таҳти унвони «Суруди сарбоз» байни сарбозон ва афсарони қисмҳои низомӣ баргузор гардид.Озмуни мазкур бахшида ба Рӯзи Парчами давлатии Ҷумҳурии Тоҷикистон бо мақсади таблиғи ғояҳои ифтихори миллӣ ва ватандӯстии ҷавонон, дарёфти истеъдодҳои нав миёни сарбозон доир гардид.Дар озмун аз қисмҳои низомии шаҳру ноҳияҳои Чкалов, Ғафуров, Хуҷанд, Қайроққум ва факултаи 4-уми Академияи Вазорати корҳои дохилии Ҷумҳурии Тоҷикистон дар шаҳри Хуҷанд иштирок намуданд. Ҷои якумро факултаи 4-уми Академияи Вазорати корҳои дохилии Ҷумҳурии Тоҷикистон дар шаҳри Хуҷанд, ҷои дуюмро сарбозони қисми низомии 051056 — и Гвардияи миллии шаҳри Чкалов ва ҷои сеюмро сарбозони қисми низомии 14356 – и ноҳияи Ғафуров сазовор гардида, ғолибон ва иштирокчиёни фаъол бо тӯҳфаю ифтихорномаи мақомоти иҷроияи ҳокимияти давлатии вилояти Суғд ва Раёсати ҷавонон, варзиш ва сайёҳии вилоят сарфароз гардонида шуданд.