Таъсиси Фонди дастгирии олимпичиён

Душанбе, 22 ноябр. (АМИТ «Ховар», Дилшодаи Хайруллоҳ). – Имрӯз дар ҷаласаи нахустини Шӯрои рушди тарбияи ҷисмонӣ ва варзиши назди Ҳукумати Ҷумҳурии Тоҷикистон, ки таҳти роҳбарии раиси шӯро, Сарвазири Ҷумҳурии Тоҷикистон Оқил Оқилов баргузор гардид, масъалаҳои муҳими вобаста ба рушди тарбияи ҷисмонӣ ва варзиш мавриди баррасӣ қарор гирифтанд. Аз ҷумла, доир ба иҷрои дастуру супоришҳои Президенти Ҷумҳурии Тоҷикистон Эмомалӣ Раҳмон, ки дар мулоқот бо варзишгарони мамлакат аз 20 декабри соли 2010 дода буд, гузориши масъулини сохторҳои дахлдор шунида шуд. Роҳбарияти Кумитаи олимпӣ дар бораи омодагии дастаи олимпии мамлакат ба бозиҳои олимпии Лондон — 2012 гузориши муфассал пешниҳод намуд. Шӯро нисбат ба масъалаҳои баррасигардида қарори дахлдор қабул намуд. Қарор дода шуд, ки дар назди Кумитаи олимпӣ фонди дастгирии олимпичиён созмон дода шавад. Ба фонди мазкур дар қатори вазорату идораҳои дахлдор, корхонаҳои саноатӣ, бонкҳо, инчунин ширкатҳои тиҷоратӣ, ҷамъиятҳои саҳҳомӣ ва шахсони алоҳида метавонанд аъзо шаванд.Имкониятҳои фонди мазкур барои рушди ҳаракати олимпӣ дар кишвар, пешрафти варзиш, дастгирии варзишгарон, омодагӣ ва иштироки онҳо дар мусобиқаҳои байналмилалӣ равона мегардад.