Таъсиси «Осмони беғубор»

Душанбе, 15 ноябр.(АМИТ «Ховар», Лаззат Диловарзод).- Бино ба иттилои соҳибкори хуҷандӣ Муяссара Сангинова, аввалин таҳкурсии корхонаи сӯзишвории дизелӣ аз партовҳо дар километри даҳуми шаҳри Хуҷанд гузошта шуд. Бо қарори ҳукумати шаҳри Хуҷанд нақшаи сохтмон пурра муайян шудааст. Мутахассисон корхонаи истеҳсоли сӯзишвории дизелиро дар назди партовгоҳи шаҳр, ки беш аз 20 гектарро дар бар мегирад, қобили қабул донистанд. Барои истеҳсоли сӯзишвории дизелӣ таҷҳизоти олмонии синтези катализатории сӯзишвории дизелӣ (КСД — 500) истифода мешавад.Ба гуфти М. Сангинова, тавассути ин таҷҳизот дар як соат аз партовҳо то 1,5 ҳазор литр сӯзишвории дизелӣ истеҳсол намудан мумкин аст. Тахмин меравад, ки корхонаи партовҳои шаҳри Хуҷанд барои 50 сол маводи истеҳсолӣ дорад. Баробари ҷамъоварии партовҳои ҳаррӯза мӯҳлати истифодаи он ду баробар афзуда ва ин таҷҳизотро дар ҳамаи шаҳру ноҳияҳои ҷумҳурӣ, ки партовгоҳ доранд, истифода кардан мумкин аст. Муҳим он аст, ки маводи истеҳсолшуда аз ҷиҳати экологӣ безарар ва арзон хоҳад буд.