Таваҷҷӯҳи Президент ба навсозии роҳҳои манотиқи кишвар

Душанбе, 30 ноябр. (АМИТ «Ховар», Бекназари Абӯбакр). — Барномаи нави сармоягузорӣ, грантҳо ва сохтмони асосӣ барои солҳои 2012-2014 бо ҷалби беш аз 15 миллиард доллари амрикоӣ татбиқи зиёда аз 100 лоиҳаро дар назар дорад. Ин Барнома 29 ноябр дар маҷлиси навбатии Ҳукумати мамлакат тасдиқ гардид. Сарвари давлат Эмомалӣ Раҳмон дастур дод, ки дар ин барнома ҷалби сармоягузорӣ ба навсозии роҳҳои мошингарди Хуҷанд-Исфара, Айнӣ-Панҷакент, Ҳамадонӣ-Фархор-Панҷ, Восеъ-Темурмалик, Кўлоб-Ховалинг, Данғара-Темурмалик-Балҷувон-Ховалинг ва ҳамчунин бунёди мактабу шифохонаҳои нав ва дигар иншооти иҷтимоӣ ба назар гирифта шавад.Дар маҷлиси Ҳукумат ҳамчунин як қатор барномаҳои дигар, аз ҷумла, Барномаи давлатии мусоидат ба шуғли аҳолӣ барои солҳои 2012-2013 тасдиқ шуд. Тибқи ин барнома дар давоми 2 соли оянда дар кишвар бояд наздики 250 ҳазор ҷойҳои нави корӣ муҳайё шаванд ва беш аз 27200 нафар бекор ба ҳунаромўзӣ ҷалб гарданд. Ҳамчунин ҷудо намудани 5,8 миллион сомонӣ барои додани қарзҳои хурди имтиёзӣ ба шаҳрвандони бекор барои ташкили соҳибкорӣ дар назар дошта шудааст. Дар маҷмўъ барои татбиқи босамари ин барнома харҷи беш аз 25,2 миллион сомонӣ пешбинӣ мешавад.