«Зарафшон» ғолиби лигаи якум

Душанбе, 28 ноябр. (АМИТ «Ховар», Аловиддин Бӯриев). – Чемпионати Тоҷикистон оид ба футбол байни дастаҳои лигаи якум бо ғалабаи тими «Зарафшон»-и шаҳри Панҷакент ба анҷом расид. Дар зинаи дуввум ва сеюм дастаҳои «Ҳосилот»-и Фархор ва «Сабо»-и Шаҳринав ҷой гирифтанд. Ду дастаи аввал барои ширкат дар мусобиқаи қаҳрамонии ҷумҳурӣ байни дастаҳои лигаи олӣ дар соли 2012 роҳхат гирифтанд. Дар сурати зиёд кардани иштирокчиён дар чемпионати соли оянда ва ё аз нигоҳи молиявӣ даст кашидани ягон даста аз иштирок дар мусобиқаи мазкур дастаҳои «Сабо» ва «Ситора» имкон пайдо мекунанд, то ба қатори дастаҳои лигаи олӣ шомил шаванд.