Ҳамкории Тоҷикистону Афғонистон дар бахши ҳолатҳои фавқулодда

Душанбе, 22 декабр. (АМИТ «Ховар», Лутфия Эшонқулова ). – Ба қарибӣ раиси Раёсати умумимиллии мубориза бо офатҳои табиии Давлати Исломии Афғонистон Муҳаммаддоим Кукард ва директори Маркази миллии ҳамоҳангсозии мубориза бо офатҳои табиии Давлати Исломии Афғонистон Муҳаммадсайид Қозӣ аз Кумитаи ҳолатҳои фавқулодда ва мудофиаи граждании (КҲФ ва МГ) назди Ҳукумати ҶТ дидан карданд. Тавре дар маркази матбуоти КҲФ ва МГ ба АМИТ «Ховар» маълум гардид, мақсад аз ташрифи меҳмонон шиносоӣ бо фаъолияти Кумитаи ҳолатҳои фавқулодда ва мудофиаи гражданӣ буд. Муҳаммаддоим Кукард ва Муҳҳамадсайид Қозӣ бо ниҳодҳои сохтории кумита шинос шуда ва аз рӯи натиҷаи мулоқот бо раиси КҲФ ва МГ назди Ҳукумати Ҷумҳурии Тоҷикистон Ҳабибулло Латипов созишномаи ҳамкорӣ дар бахши ҳолатҳои фавқулодда имзо гардид.