Ҳаракати номунтазами нақлиёт ва беэътибории иҷозатнома

Душанбе, 2 декабр. (АМИТ «Ховар», Лаззат Диловарзод),- Ҳафтаи равон ҷаласаи васеи кории шаҳрдорӣ баргузор гардид. Дар ҷаласа баробари даҳҳо масъалаҳои муҳокимашаванда, масъалаи хоҷагидории шаҳр дар самти хизматрасонии аҳолии пойтахт ва фаъолияти сохторҳои марбутаи хизматрасон, аз ҷумла вазъи хизматрасонии нақлиёти мусофиркашонии ҷамъиятӣ ва ҳолати роҳҳои шаҳраку маҳаллаҳо мавриди баррасӣ қарор гирифт. Бино ба гуфти котиби матбуотии шаҳрдорӣ Шавкат Саидов, раиси шаҳр Маҳмадсаид Убайдуллоев дар асоси санҷишҳои ҷамъиятӣ аз фаъолияти қисме аз 85 хатсайри амалкунандаи пойтахт изҳори нигаронӣ намуда, таъкид намудааст, ки назорати ҳамарӯзаи сохторҳои хизматрасон дар тамоми хатсайрҳо ба таври қатъӣ зери назорат гирифта шавад. Раиси шаҳр таъкид сохтааст, ки дар ҳолати риоя нагардидни ҳаракати мӯътадили нақлиёт, ки боиси нигаронии мусофирон мегардад, хатсайрҳои мазкур бо беэътибор донистани иҷозатномаи ҷамъиятҳо оид ба фаъолияти мусофиркашонӣ ба дигар ҷамъиятҳои дорои иҷозатнома, вобаста карда шаванд. Ба ибораи дигар, иҷозатномаҳои хатсайрҳои ронандагони худсар ва ҷамъиятҳои мусофиркашонии он хатсайрҳо барҳам дода мешаванд.