Анҷоми чемпионати футболи Тоҷикистон

Душанбе, 27 декабр. (АМИТ «Ховар», Аловиддин Бӯриев).- Чемпионати футбол байни дастаҳои лигаи олӣ ба анҷом расид. Дар бозии охирини мавқуфгузошта бо ширкати дастаҳои «Истиқлол» ва «Равшан» футболбозони шаҳри Кӯлоб ба бозӣ ҳозир нашуданд ва ба онҳо бохти техникии 3 бар 0 мансуб дониста шуд. Ин натиҷа ба мавқеи дастаҳо дар ҷадвали мусобиқа таъсир нарасонд. Ҳамин тариқ, чемпионати тӯлонӣ дар мавсими соли 2011 ба поён расид. Дастаи «Истиқлол»-и Душанбе бо касби 108 имтиёз зинаи аввалро соҳиб шуда унвони чемпиониро маротибаи дуввум комёб гардид. «Регар ТадАЗ» барандаи мақоми дуввум шуда ва ҷои сеюм насиби дастаи «Равшан»-и Кӯлоб гардид. Ҳамлагари дастаи «Истиқлол» Юсуф Рабиев (бо 32 гол) нишонзани беҳтарини мусобиқа шинохта шуд. Фарҳод Тоҳиров (бо 27 гол) аз ҳамин даста ҷои дуввум ва Комил Саидов, бозингари ССКА “Помир”-и Душанбе (бо 21 гол) ҷои севвумро касб карданд.