«Аз Балх то Куния»

Душанбе, 21 декабр. (АМИТ «Ховар», Мавҷуда Анварӣ).- Дар шаҳри Теҳрон дар маркази Доиратулмаориф (Энсиклопедия)–и бузурги исломии ҷумҳурии Исломии Эрон бахшида ба бузургдошти Мавлоно Ҷалолиддини Румӣ ҳамойиши байналмилалии “Аз Балх то Куния” баргузор гардид. Тавре ки аз ВКХ-и Тоҷикистон ба АМИТ «Ховар» иттилоъ доданд, дар нишасти мазкур олимон, муҳаққиқон, устодони донишгоҳҳо аз кишварҳои ҷаҳон, инчунин намояндагони дипломатии кишварҳои хориҷии муқими Теҳрон ҳузур доштанд. Давлаталӣ Ҳотамов, сафири Тоҷикистон дар Эрон оид ба хизматҳои таърихии ин фарзанди фарзонаи халқи тоҷик дар рушди адабиёту фарҳанги тоҷикон ва халқҳои ҷаҳон изҳори андеша карда, зикр намуд, ки «Мавлоно мардумони оламро ба ваҳдат, сулҳу дӯстӣ, ҳамзистию ҳамфикрӣ даъват мекунад, дар байни миллатҳои гуногуни олам муҳаббату эҳтиром ва ҳамфикрию ҳамдилӣ эҷод менамояд, саодату хушбахтии насли башарро тавсиф мекунад. Ашъору афкори ӯ маҳдуд ба як қавму миллат ва ё дину оин набуда, ба тамоми башарият нигаронида шудааст».